សៀមរាប៖ យ៉ាងហោចណាស់អ្នកដំណើរជាជនជាតិខ្មែរម្នាក់បានស្លាប់ភ្លាមៗ និងរបួសចំនួន០៣នាក់ ក្នុងឧបទ្ទវហេតុគ្រោះធម្មជាតិ នៅចំណុចខ្លោងទ្វារទន្លេ ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ដោយសារភ្លៀងលាយឡំនឹងខ្យល់កន្ត្រាក់ បណ្តាលឱ្យរលំដើមឈើមួយដើមបាក់សង្កត់រូបចម្លាក់មួយចំនួន និងប្រជាពលរដ្ឋឆ្លងកាត់ទីតាំងនោះ។

ជនរងគ្រោះត្រូវបានជួយសង្គ្រោះ និងកំពុងសម្រាកព្យាបាលនៅមន្ទីរពេទ្យ ខណៈដើមឈើដែលបាក់រលំត្រូវបានរដ្ឋបាលខេត្ត និងអាជ្ញាធរជាតិអប្សរា បានកាត់ចេញ ដើម្បីបញ្ចៀសចរាចរនៅកន្លែងកើតហេតុរួចរាល់ទាំងស្រុងនៅវេលា ម៉ោង២០៖៣០នាទី ថ្ងៃខែឆ្នាំដដែល។

បើតាមការបញ្ជាក់របស់រដ្ឋបាលខេត្តសៀមរាប ដើមឈើមួយដើមនៅទន្លេអុំ ដែលបានដួលរលំសង្កត់រូបចម្លាក់ទាញព្រ័ត្រ និងសង្កត់លើរ៉ឺម៉កម៉ូតូបានបង្កគ្រោះថ្នាក់ដល់អ្នកដំណើរទាំង ៤នាក់ខាងលើ។

ក្រោយកើតហេតុ អភិបាលខេត្ត លោក ប្រាក់ សោភ័ណ្ឌ និងអាជ្ញាធរជាតិអប្សរាបានដឹកនាំកម្លាំងចុះពិនិត្យ និងសង្គ្រោះអ្នករងរបួស។

ក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ និងអាជ្ញាធរជាតិអប្សរា បានចូលរួមរំលែកទុក្ខយ៉ាងក្រៀមក្រំ ចំពោះគ្រួសារសព និងចូលរួមសោកស្តាយចំពោះបងប្អូន ប្រជាពលរដ្ឋ ដែលបានរងរបួសនៅក្នុងឧបទ្ទវហេតុគ្រោះធម្មជាតិនេះ៕